സര്ക്കാര് മേഖലയില് കരള് മാറ്റിവയ്ക്കല് ശസ്ത്രക്രിയ വിജയകരമായി ആരംഭിച്ചത് ഈ സര്ക്കാരിന്റെ കാലത്താണ്. കരള് മാറ്റിവയ്ക്കല് ശസ്ത്രക്രിയയ്ക്ക് ആവശ്യമായ സംവിധാനങ്ങളൊരുക്കി കോട്ടയം മെഡിക്കല് കോളേജിലും തിരുവനന്തപുരം മെഡിക്കല് കോളേജിലും യാഥാര്ത്ഥ്യമാക്കി.
എല്ലാ കരള് മാറ്റിവയ്ക്കല് ശസ്ത്രക്രിയകകളും (10 എണ്ണം) വിജയിപ്പിക്കാനായി. 7 കരള് മാറ്റിവയ്ക്കല് ശസ്ത്രക്രിയകള് കോട്ടയം മെഡിക്കല് കോളേജിലും 3 കരള് മാറ്റിവയ്ക്കല് ശസ്ത്രക്രിയകള് തിരുവനന്തപുരം മെഡിക്കല് കോളേജിലുമാണ് നടന്നത്.
ലക്ഷക്കണക്കിന് രൂപ ചെലവ് വരുന്ന അവയവം മാറ്റിവയ്ക്കല് ശസ്ത്രക്രിയകളില് രോഗികള്ക്കുണ്ടാകുന്ന സാമ്പത്തിക പ്രതിസന്ധി പരിഹരിക്കണമെന്ന ലക്ഷ്യത്തോടെയാണ് മന്ത്രി വീണാ ജോര്ജിന്റെ നിരന്തരമായ ഇടപെടലുകളിലൂടെ സര്ക്കാര് ആശുപത്രികളില് അവയവം മാറ്റിവയ്ക്കല് ശസ്ത്രക്രിയകള് യാഥാര്ത്ഥ്യമാക്കിയത്.
സ്വകാര്യ ആശുപത്രികളില് 40 ലക്ഷത്തിലധികം രൂപ ചെലവു വരുന്ന കരള് മാറ്റിവയ്ക്കല് ശസ്ത്രക്രികയകള് സര്ക്കാര് മെഡിക്കല് കോളേജുകളില് പ്രത്യേക ഫീസ് അടപ്പിച്ചല്ല ചെയ്യുന്നത്. വിവിധ സര്ക്കാര് ഫണ്ടുകളിലൂടെയും ആശുപത്രി വികസന സമിതി ഫണ്ടുകളിലൂടേയുമാണ് രോഗിക്ക് ചികിത്സയൊരുക്കുന്നത്. രോഗിക്കാണ് പ്രാധാന്യം നല്കുന്നത്. അല്ലാതെ സ്വകാര്യ ആശുപത്രികളെപ്പോലെ ഫീസ് കെട്ടിവയ്പ്പിച്ചല്ല ശസ്ത്രക്രിയ നടത്തുന്നത്. സാധാരണക്കാരായ കൂടുതല് രോഗികള്ക്ക് സഹായകരമാകാനാണ് ശ്രമിക്കുന്നത്.
സര്ക്കാര് ആശുപത്രികളില് കരള് മാറ്റിവയ്ക്കല് ശസ്ത്രക്രിയകള് യാഥാര്ത്ഥ്യമാക്കണമെന്ന ഇച്ഛാശക്തിയുടെ ഫലമായാണ് ഈ സര്ക്കാരിന്റ കാലത്ത് ഇത് സാധ്യമാക്കിയത്. മന്ത്രി വീണാ ജോര്ജിന്റെ നേതൃത്വത്തില് നിരന്തരം ചര്ച്ചകളും ഇടപെടലുകളും നടത്തി മികച്ച സൗകര്യങ്ങളൊരുക്കിയാണ് മെഡിക്കല് കോളേജുകളില് കരള് മാറ്റിവയ്ക്കല് ശസ്ത്രക്രിയ യാഥാര്ത്ഥ്യമാക്കിയത്. 2022 ഫെബ്രുവരി 14ന് കോട്ടയം മെഡിക്കല് കോളേജിലാണ് ആദ്യമായി കരള് മാറ്റിവയ്ക്കല് ശസ്ത്രക്രിയ വിജയിപ്പിച്ചത്. തുടര്ന്നാണ് രണ്ട് മെഡിക്കല് കോളേജുകളിലുമായി ഇത്രയും കരള്മാറ്റിവയ്ക്കല് ശസ്ത്രക്രിയകള് നടത്തിയത്.
സര്ക്കാര് മേഖലയില് കരള്മാറ്റിവയ്ക്കല് ശസ്ത്രക്രിയ വിജയിച്ചിരിക്കുന്നത് ആരോഗ്യ മേഖലയുടെ വലിയൊരു നേട്ടം കൂടിയാണ്. സംസ്ഥാനത്ത് അവയവം മാറ്റിവയ്ക്കാനായി കാത്തിരിക്കുന്നവര് ധാരാളമുണ്ട്. സ്വകാര്യ മേഖലയില് 40 ലക്ഷത്തോളം രൂപ ഇത്തരം ശസ്ത്രക്രിയയ്ക്ക് വേണ്ടി വരും. അവയവം മാറ്റിവയ്ക്കല് ശസ്ത്രക്രിയയ്ക്ക് വിധേയനാകുന്ന വ്യക്തിയെ സംബന്ധിച്ച് വലിയ സാമ്പത്തിക പ്രതിസന്ധിയാണ് ഇതുമൂലം ഉണ്ടാകുന്നത്.
ഇതിനൊരു പരിഹാരം കാണാനാണ് സര്ക്കാര് മേഖലയില് കരള് മാറ്റിവയ്ക്കല് ശസ്ത്രക്രിയ യാഥാര്ത്ഥ്യമാക്കിയത്. ഇത് കൂടാതെ അവയവദാന മേഖലയുമായി ബന്ധപ്പെട്ട എല്ലാ പ്രവര്ത്തനങ്ങളും ഒരു കുടക്കീഴില് കൊണ്ടു വരിക എന്ന ലക്ഷ്യവുമായി കോഴിക്കോട് 643.88 കോടി രൂപയുടെ ട്രാന്സ്പ്ലാന്റ് ഇന്സ്റ്റിറ്റ്യൂട്ട് സ്ഥാപിക്കുന്നു. ഇതിന്റെ ആദ്യഘട്ടം ഉടന് പ്രവര്ത്തനം ആരംഭിക്കും.
അവയവങ്ങള്ക്ക് കേടുപാട് വന്നവരുടെ ചികിത്സ മുതല് അവയം മാറ്റിവയ്ക്കല് ശസ്ത്രക്രിയയും പുനരധിവാസവും വരെയുള്ള സമഗ്ര പരിചരണം സാധ്യമാക്കുന്ന തരത്തിലാണ് ഇന്സ്റ്റിറ്റ്യൂട്ട് രൂപകല്പന ചെയ്തിരിക്കുന്നത്.
കരള്മാറ്റിവയ്ക്കല് ശസ്ത്രക്രിയ പ്രത്യേക ഫീസ് അടപ്പിച്ചല്ല നടത്തുന്നത്
About the Author
